Ekainaren 30ean, Andoaingo Udalaren ohiko bilkuran, eztabaidagai izan zen Ottitta-Leitzaran izeneko enpresak Otitako zentrala izan zen eraikinean sustatzen duen ostalaritza eta jatetxe egitasmoa.
Eguzkiko kideak udalbatzan izan ez bagina ere,
interesez jarraitu genuen eztabaida eta benetan etsigarria izan zela esan behar
dugu.
Etsigarria diogu, bertan ez zelako eztabaidatu ea
ingurune horrek, bere babes baldintza bereziak kontuan hartuta, halako egitasmo
bat behar duen, kokalekua egokia den eta halakoak. Alderdi ezberdinen arteko
parte hartzeak, neurri handi batean Udalak halako gaiak nola kudeatu behar
dituen eztabaidatzera zuzendu ziren. Soilik, PSE eta EAJren gobernantza ereduaren,
herritarrekiko eta herri eragileekiko duten jarrera baztertzailearen inguruan
eduki zuen interes apur bat eztabaidak.
Gure ustetan, batzar aretoan mahai gaineratu
zen gaiaren aurretik, oinarrizko eztabaida eta dagokion erabakiak hartu behar
dira, Leitzaran Biotopo Babestuaren
kudeatzeko asmoen, erabileren eta helburuei dagokionean. Eta erabaki
horietan, bailararako naiz bebesgunerako sarrera nagusia Andoainen egonik,
zerikusi eta zeresan handia du Andoaingo Udalak.
Irizpide
estrategikoen eztabaida eza errepikatzen da.
Gauza da, duela urte t’erdi inguru Tirolina eta
Ferrata Bidearen egitasmoarekin gertatu
zen bezala, gaiaren muinari ez diote heltzen, orduan mahai gaineratutako eztabaida estrategikoaren
ardatzak baztertu eta hauek aztertzeko asmorik gabe jarraitzen baitute.
Eta eztabaida estrategikoak diogunean honelako
galderei erantzuteko gai izateko irizpideak argitu eta erabakitzeaz ari gara:
-
Non kokatu behar da
Leitzaranerako harrera edo/eta sarrera gunea?
-
Zergatik ez Lizarkolan
(Leitzaran edo Galgo Paper paper fabrikaen kokalekuan)
-
Zein helburu eta beharrei
erantzun behar die gune horretan ezarri beharreko azpiegiturek? Harrera-lekua,
hasialdirako gunea, ostalaritza edo/eta jatetxeak lekua izan behar dute?
-
Jabetza edo/eta jarduera
publikoak izan behar dute?
-
Jabetza edo/eta jarduera
publikoa izan gabe erabilera baldintzatuko zaie?
-
Irisgarritasuna nola bermatuko
da?
-
Ibilgailuak nola kudeatuko
dira? Sarrera mugatuko zaie?
-
Bisitari kopuruari muga jarri
behar zaio? Hala bada irizpìdeak?
Bide honetan, Leitzaran Parkearen (Otieta,
Olazar eta beste inguru batzuk bere barne hartzen dituena) izendapenak eta
arautzeak onurak ekarri behar zituen eta hasieran onartutako arauak eskuan
hartuta, ezinezko izango litzateke egungo tirolina dagoen lekuan eraikitzea eta
agian ezta Ottitta-Leitzaran enpresaren egitasmoa aurrera eraman ere. Baina,
horiek ere onartu orduko aldatzea pentsatu zuten udal taldeek, baita egin ere.
Ondorioz, egun, Leitzarango balioak
mantentzeko, Unanibia tirolina kokatzeko leku egokia ez zela esan genuenean
aurreratu bezala, orain diogu egitasmoak ikusiko ditugu bata bestearen atzetik
etortzen eta izango dute amankomunean gauza bat gutxienez: bat berak ere ez du
edukiko helburu nagusi gisa Leitzarango balioak mantendu edo hobetzea, biotopo
izendapenaren helburu nagusia hori izanda ere; alderantziz, Leitzaranen babes
etiketaren aitzakiatan, etekin ekonomiko edo politikoak lortzea izango dute
helburu.
Ez dugu ahaztu behar, natura ingurune bati,
babes izendapen bat ematen zaionean, ingurune hori balio natural interesgarri
eta bereizgarri batzuen jabe delako egiten dela eta izendapen horrek, natura
balio horiek mantentzen edo hobetzen lagundu behar dutela. Eta aspaldian
Andoaingo Udala hartzen ari den erabakiak ez doaz norabide horretan.
Esanak esan, Eguzkikook ez gara jarduera jakin
baten kontra ari, ez tirolina+ ferrata bidearen kasuan, ezta oraingoan ere, ingurune garrantzitsu eta sentibera baten
kontserbazioaren, hala nola lurraren erabilera egoki eta zehatz baten alde
baizik.
Laburbilduz
zera eskatzen dugu:
-
Otitako
zentralean aurrera eraman nahi duten egitasmoaren hasierako onarpen hori atzera
botatzea edo gutxienez “izoztuta” uztea.
-
Leitzaran
Biotopo babestuaren erabilera, babes neurrien eta kudeaketarako plangintza bat
gauzatzea lehen bait lehen.
-
Plangintza
horren barne, udalerrian parke periurbanoak sortzeko egitasmoa barneratu
beharko litzateke.
-
Plangintza
gauzatu edo indarrean sartu aurretik, sakoneko erabakirik ez hartzea.
-
Eta
noski, beharrezkoa den erakunde guztien eta batez ere, hala nahi duten
herritarren parte hartzea bermatzea.
Eguzki
Talde Ekologista eta Antinuklearra 2022ko uztailaren 4an.
0 comentarios:
Publicar un comentario