Para leer en castellano:
http://eguzki.org/default.cfm?hizkuntza=2&atala=portadako_albistea_irakurri&id=461&azpiatala=
Eguzkik txalotu
nahi du Aldundiak gauzatu duen Ingurumeneko Zerbitzuburuaren aldaketa
Ingurumeneko Sailean, Gipuzkoan gauzatu behar diren apustu estrategiko eta
aldaketa estrukturaletarako beharrezko urratsa baitzen: hondakinak, energia,
Tokiko Agenda 21, e.a... Lehengo foru-burua Ingurumenaren eta
osasun-publikoaren aurkako politiken ardura teknikoa zuen, errausketa toxikoa
barne, lobby ekonomikoen bidean zegoelarik, herritarren naiz interes
orokorrarenean egon beharrean.
Era berean,
Eguzkik foru-kudeaketa eraginkor eta modernorako urrats egoki eta ausartekin
jarraitzeko esan dio Aldundiari, bide horretan Mendietako Zerbitzuaren
arduradunaren aldaketa ere lehenbailehen aurrera eramateko eskatu diolarik.
Legealdi honetan edozein aldaketa egiteko oposizioa nabaria da Mendietako
Zerbitzuan. Honen izaeraren definizioa hiru hitzetan laburtu daiteke:
ez-eraginkorra, atzerakoia eta interes pribatuei zuzendua.
Gipuzkoako
mendien eta bertako basoen egoera latzaren ardura foru Zerbitzu horretan
kokatzen du Eguzkik, azken urteetan bertan EAJren neoliberalismoaz eta lobbyen
bultzadaz kudeatu bait dira Gipuzkoako mendiak eta geratzen zaizkigun baso
urriak, Erdiarora eramanez Gipuzkoako natur kontserbazioko politikak: zuhaitz
exotikoen bidezko baso landaketa masiboak, bioaniztasun-galeraren maila
handiak, baso naturalen kontserbazio-egoera txarra, mendi-pisten milaka
kilometroen eraikuntza, desagertzeko bidean dauden dozenaka espezieak izatea,
naturgune eta Parke Naturalen legez kanpoko planifikazio-eza, natur paisaien
suntsiketa, eta abar.
Eta nola ez,
aldaketa estruktural eta apustu estrategikoak orain arte baina azkarrago ematea
eskatzen dugu, legegintzaldi bukatu ez dakien aldaketa horiek martxan
jartzerako.
Eskaera hauek ez dira kasualitate huts, azken urtean
Gipuzkoako 16 erakunde ekologista eta kontserbazionisten kritikak
Aldundiarekiko areagotu bait dira, herrialdeko naturaren eta basoen
kontserbazioan ematen ari diren gabeziak eta ingurumen-inpaktuak salatuz.
0 comentarios:
Publicar un comentario